Panalangin sa Bagong Bukas
O aming Diyos, Amang
Kataas-taasan, muli kami ay nangagtipon ngayon upang ikaw ay purihin at
pasalamatan. Maraming salamat Panginoon sa iyong walang hangggang awa at
pagkalingang patuloy na ibinibigay sa amin.
O aming Diyos kami ay lubos na
nagpapasalamat sa isa na namang taong lumipas. Ito ay humubog ng aming katauhan
at nagbigay sa amin ng karangalang ika’y mapaglingkuran.
Nawa ang aming mga naging
kahinaan at mga kabiguan noon ay magsilbing aral sa aming panahon ngayon. At
ang mga bagay na aming nakita, nagawa at natutunan ay magamit naming sandalan
sa patuloy na paglilingkod sa iyo.
Maraming salamat panginoon sa
bagong taon na muli ay iyong pinagkaloob sa amin. Ito ay bagong pag-asa upang
makamit namin ang aming mga layunin sa buhay, sa aming mga kaibigan, sa aming
pamilya at sa tangggapang aming pinaglilingkuran. Isang bagong pagkakataon
upang aming mapunan ang aming mga naging kakulangan, isang bagong bukas upang
maituwid ang aming mga naging pagkakamali.
Aming Diyos hinihingi namin ang
iyong patnubay upang patuloy naming labanan ang aming mga kahinaan, patuloy na
mag-ingat sa aming mga ginagawa, patuloy na maging mahinahon, patuloy na
magpunyagi, patuloy na isaisip ang mabuti, patuloy pang magsikap at mabigo, at
patuloy na mangarap…upang lalong matutunan ang buhay, patuloy na maging
mabuting manggagawa, patuloy na maging mabuting halimbawa, upang patuloy na
maging malinis na handog sa iyo.
Ito ang aming papuri, ito ang aming pasasalamat, ito ang
aming panalangin sa pangalan ni Hesus na aming Panginoon, Amen.
No comments:
Post a Comment